چھوٹے چھوٹے بچے، چار سال، تین سال، دو سال اور یہاں تک کہ ایک سال تک کے کیسز سامنے آ رہے ہیں۔ پہلے لوگ صرف لڑکیوں کی حفاظت کا سوچتے تھے، لیکن آج کے دور میں لڑکے بھی محفوظ نہیں۔ آئے دن معصوم بچیاں دردناک طریقے سے قتل ہو رہی ہیں۔ کچھ لوگوں کا کہنا ہے کہ اس کے پیچھے پورا ایک نیٹ ورک کام کر رہا ہے اور واٹس ایپ گروپس بنے ہوئے ہیں جہاں یہ غلیظ مواد دکھایا اور بیچا جاتا ہے، جس کی وجہ سے ٹین ایجرز میں یہ جذبات پیدا ہو رہے ہیں۔ ہو سکتا ہے یہ بات سچ ہو، لیکن سب سے بڑا سچ یہ ہے کہ ہمارا معاشرہ مجموعی طور پر اخلاقی گندگی کے دہانے پر پہنچ چکا ہے۔ سوچ سوچ کر دماغ پاگل ہونے لگتا ہے۔

میری ایک دوست نے بتایا کہ اس نے اپنے چھت سے تین چار سال کے دو چھوٹے بچوں کو آپس میں غیر اخلاقی حرکت کرتے دیکھا۔ اتنے چھوٹے بچوں کو کیا معلوم؟ اس نے جب ان بچوں کی ماں سے بات کی تو وہ کہنے لگی: ”چھٹیوں میں میری نند آئی تھی، بچوں نے اس کے بچوں سے یہ سب سیکھا ہے۔ میں نے انہیں مارا بھی ہے لیکن یہ باز نہیں آ رہے۔“

یہ بات تمام والدین کے لیے سوچنے کی ہے کہ بچے آخر یہ سب سیکھ کہاں سے رہے ہیں؟ کیونکہ اتنے چھوٹے بچے تو موبائل بھی نہیں چلاتے، پھر بھی ان میں یہ غلط حرکات کیسے آئیں؟ یقیناً انہوں نے کسی بڑے سے سیکھا ہے۔ ایک بڑا دوسرے کو سکھاتا ہے، اور پھر وہ آگے اپنے سے چھوٹوں میں منتقل کرتا ہے، یہ سلسلہ یوں ہی چل نکلتا ہے۔

میں جانتی ہوں کہ چوبیس گھنٹے بچوں کی پہرے داری ممکن نہیں۔ اگر بچوں کو باہر نہ بھی بھیجیں اور گھر میں ہی کھلائیں، تب بھی اسکول جانا، رشتہ داروں کے گھر جانا، کزنز سے ملنا اور مختلف تقاریب میں شرکت کرنا تو ہوتا ہی ہے۔ جب اردگرد کا ماحول ہی خراب ہو تو بچنا بہت مشکل ہو جاتا ہے۔ والدین اپنی آنکھیں کھولیں، یہ خطرہ آپ کے اردگرد تک پہنچ چکا ہے۔ اب اس سے کیسے بچنا ہے، یہ آپ کی مسلسل کوشش اور اللہ سے دعا پر منحصر ہے۔

مجھے سب سے زیادہ اس بات کا ڈر رہتا ہے کہ کہیں میرا بچہ کسی برے فرد کو اپنا دوست نہ بنا لے۔ میں نے اپنے بچوں کو باہر کوئی دوست نہیں بنانے دیا۔ ساتھ والے گھر میں کزن کے بچے ہیں اور چھت سانجھی ہے، بس ان کے ساتھ کھیلتے ہیں اور اس پر بھی میں اکثر نگرانی رکھتی ہوں۔ آج تک میں نے اپنے بچوں کو اکیلے کہیں رہنے نہیں بھیجا۔ ایک بار ایک شادی میں جانا ہوا تو وہاں دیکھا کہ دو بچے ہر وقت فون پر گانے سن رہے تھے۔ مجھے فوراً کھٹکا ہوا اور میں نے سایے کی طرح اپنے بچوں کی حفاظت کی اور ان سے دوستی نہیں کرنے دی۔ تین دن سولی پر گزار کر شکر ادا کیا کہ خیر سے گھر واپس آ گئے۔

اردگرد جو 13 سے 14 سال کے بچے آدھی آدھی رات تک موبائل چلا رہے ہیں، سنوکر کلبوں اور گیمز پوائنٹس پر بیٹھے رہتے ہیں، ان کی شکلیں دیکھ کر میں پختہ یقین کے ساتھ کہہ سکتی ہوں کہ یہ بچے صحیح سمت میں نہیں جا رہے۔ مجھے سمجھ نہیں آتی کہ والدین کا اس طرف دھیان کیوں نہیں؟ روزانہ کی خبریں سن کر بھی ہم میں عقل کیوں نہیں آتی؟ یہ تو وہ چند کیسز ہیں جو سامنے آتے ہیں جہاں ظلم و تشدد سے قتل ہوتا ہے، جبکہ ہزاروں بلکہ لاکھو ں کیسز ایسے ہیں جو کبھی سامنے ہی نہیں آتے، جہاں ٹین ایجرز یا بڑی عمر کے لڑکے آپس میں شرمناک تعلقات میں مبتلا ہیں، اور کالجز و یونیورسٹیز میں جو زنا بالرضا ہو رہا ہے اس کی تو حد ہی نہیں رہی۔

اللہ تعالیٰ ہم سب کے بچوں کو اپنے حفظ و امان میں رکھے۔ آمین!